საქართველოს
ეკონომიკისა და მდგრადი განვითარების
სამინისტრო

არაგვიჰესს, რომლის ერთი სადგური მიმდინარე წელს შევიდა ექსპლუატაციაში, ეკონომიკისა და მდგრადი განვითარების მინისტრის მოადგილე დავით თვალაბეიშვილი ეწვია და მის საქმიანობას გაეცნო. ახალი სადგურის დადგმული სიმძლავრეა დაახლოებით 2 მგვტ, ხოლო განხორციელებულმა ინვესტიციამ 8,8 მლნ ლარი შეადგინა. არაგვიჰესი-2 ერთ-ერთია იმ  11 ჰიდროსადგურიდან, რომელიც ქვეყნის ენერგოსისტემას ბოლო 2 წლის მანძილზე შეემატა. მათი დადგმული სიმძლავრე 100 მგვტ-ია. არაგვიჰესის ორივე სადგურზე 10 ადამიანია დასაქმებული, რომელთა აბსოლუტური უმრავლესობა ადგილობრივი მოსახლეა. 

არაგვიჰესი და მისი წყალსაცავი ენერგეტიკული დანიშნულების გარდა, ადგილობრივი ეკონომიკის სხვა სექტორების განვითარებასაც უწყობს ხელს. ჰესის მშენებლობისას გაყვანილი გზა და ხელოვნური ტბა იზიდავს ტურისტებს. ხეობა, რომელიც მანამდე გაუვალი იყო, მესაქონელობის განვითარებისთვის ხელსაყრელი გახდა, აღდგენილი გზით ადგილობრივ ფერმერებს საქონელი გადაჰყავთ. 

სადგურისა და მისი ინფრასტრუქტურის მშენებლობამ ხელი შეუწყო ტურისტულ ბიზნესს. კერძოდ, ხეობაში საქმიანობენ კომპანიები, რომლებიც ექსტრემალური ტურიზმის მოყვარულებს კვადროციკლების დაქირავებასა  და პარალანებით ფრენას სთავაზობენ. 

„მნიშვნელოვანია, რომ საქართველოში ელექტროენერგიის გაზრდილი მოხმარების დაკმაყოფილება ადგილობრივი რესურსებით მოხდეს. ჩვენ საქართველოს ენერგოსექტორში დაახლოებით 1 მლრდ აშშ დოლარის ინვესტიციის განხორციელების შესახებ მემორანდუმები გავაფორმეთ. ჩვენი ვარაუდით, მომავალი 3 წლის განმავლობაში ჩვენს სისტემას 500 მგვტ-მდე დამატებითი სიმძლავრე შეემატება და დაახლოებით 40-მდე ჰესი და სხვა ენერგოობიექტი აშენდება“ - განაცხადა ეკონომიკისა და მდგრადი განვითარების მინისტრის მოადგილემ დავით თვალაბეიშვილმა.