ბათუმში „პარტნიორთა და დამსაქმებელთა ფორუმი 2018“ გაიხსნა
23-02-2018

საქართველოს ეკონომიკისა და მდგრადი განვითარების მინისტრის მოადგილემ გიორგი ჩერქეზიშვილმა და ბათუმის სახელმწიფო საზღვაო აკადემიის რექტორმა ირაკლი შარაბიძემ აკადემიის ორგანიზებით „დამსაქმებელთა და პარტნიორთა ფორუმი 2018“ გახსნეს. ღონისძიება მიზნად ისახავს კვალიფიცირებული, თანამედროვე სტანდარტების შესატყვისი, დასაქმების ბაზარზე ორიენტირებული, კონკურენტუნარიანი კადრების მომზადებისა და უკვე არსებული კადრების გადამზადების პროცესში მარეგულირებელთა, დამსაქმებელთა და სოციალურ პარტნიორთა მონაწილეობის გაფართოება, ასევე დამსაქმებლებსა და სამუშაოს მაძიებლებს შორის კავშირების დამყარების ხელშეწყობა.

როგორც ფორუმის მონაწილეებს ეკონომიკისა და მდგრადი განვითარების მინისტრის მოადგილემ, გიორგი ჩერქეზიშვილმა განუცხადა, მეზღვაურთა განათლების სისტემის გაუმჯობესება საქართველოს მთავრობის ერთ-ერთი მთავარი პრიორიტეტია. მისი თქმით, საქართველოში 9000-მდე მოქმედი მეზღვაურია, რომლებსაც დაახლოებით 100 მილიონი აშშ დოლარი შემოაქვთ ყოველწლიურად ქვეყანაში და მათი კონტრიბუცია საქართველოს, განსაკუთრებით აჭარის რეგიონის ეკონომიკაში ძალიან მნიშვნელოვანია.

„გასულ წლებში განხორციელდა ძირეული რეფორმები მეზღვაურთა განათლების სფეროში, დაინერგა ახალი პროგრამები, გაუმჯობესდა სასწავლო ინფრასტრუქტურა, შეიქმნა საერთაშორისო სტანდარტების შესაბამისი საკანონმდებლო ბაზა. რეფორმების ლოგიკური შედეგი იყო ევროკავშირის მიერ 2013 წელს ქართველ მეზღვაურთა კომპეტენციის დამადასტურებელი სერტიფიკატების აღიარება, საზღვაო აკადემია აღიჭურვა უახლესი სიმულატორებით, სტუდენტთა რაოდენობა გაიზარდა 3000-მდე, ხოლო წელს აკადემიას სახელმწიფომ საწვრთნელი გემი გადასცა“ - განაცხადა გიორგი ჩერქეზიშვილმა. 

მისივე თქმით, მიმდინარეობს მუშაობა ინგლისის პლიმუთისა და საუთჰემპტონის უნივერსიტეტებთან აკადემიაში ინგლისურენოვანი პროგრამების დანერგვის მიზნით. 2019 წლის იანვრისთვის აკადემია პროგრამის ფარგლებში მიიღებსსაქართველოს  50 და უცხო ქვეყნის 50 მოქალაქეს, გაიცემა ე.წ. "ორმაგი დიპლომი“, რომელიც აღიარებული იქნება როგორც საქართველოს განათლებისა და მეცნიერების სამინისტროს, ასევე, ინგლისის საზღვაო ხელისუფლების მიერ.

„ჩვენი მიზანია, აკადემია გადაიქცეს რეგიონის ჰაბად საზღვაო განათლების კუთხით, რომლის სასწავლო პროგრამები და მეთოდოლოგია შესაბამისობაში იქნება ბაზარზე არსებულ მოთხოვნებთან. აღნიშნულ პროცესში, მნიშვნელოვანია კერძო სექტორის აქტიური ჩართულობა და მუდმივი დიალოგი აკადემიასთან დამსაქმებელთა საჭიროებების მუდმივი მონიტორინგისა და სამომავლოდ სასწავლო პროცესში გათვალისწინების მიზნით“ - აღნიშნა ჩერქეზიშვილმა.

ღონისძიების ფარგლებში „ბათუმის სახელმწიფო საზღვაო აკადემიასა“ და სამ დამსაქმებელ და პარტნიორ ორგანიზაციას შორის (კოლეჯი“იკაროსი“, შპს "საოჯახო მედიცინის რეგიონული ცენტრი", შპს „აჭარა ტექსტილი“) ურთიერთთანამშრომლობის მემორანდუმები გაფორმდა. 

ფორუმის გახსნის ღონისძიებაში მონაწილეობდნენ  აჭარის ავტონომიური რესპუბლიკის მთავრობისა და ეკონომიკის სამინისტროს საზღვაო ტრანსპორტის სააგენტოს წარმომადგენლები, ასევე  საზღვაო განათლების სფეროში მოქმედი სასწავლო/საწვრთნელი ცენტრების, საზღვაო ინდუსტრიის, რეგიონის ტურიზმისა და ბიზნესის სფეროში მოღვაწე კომპანიების ხელმძღვანელი პირები.


დაგვიკავშირდით

1403
2 99 11 11

შიდა აუდიტი

2 99 11 61
2 99 11 70

საქართველოს ეკონომიკისა და მდგრადი განვითარების სამინისტრო. © 2021